Орусиялык ырчы, 90-жылдардагы хит ырлардын аткаруучусу Евгений Осин 54 жашында көз жумду

Орусиялык ырчы Евгений Осин 54 жашында көз жумду. Анын өлүмүнө эмне себеп болгону айтыла элек. Ырчы 17-ноябрда Москвада өз үйүндө каза болгонун анын концерттик директору "Звезда" телеканалына билдирген.

Ырчы 2017-жылы орусиялык басылмаларга берген маегинде ден соолугу начарлап жатканын, дарыланууга каражаты жок экенин айткан. Ал аракечтиктен дарыланып келгени да айтылып жүрөт.

Евгений Осиндин чыгармалары 1990-жылдары хит болуп турган. Анын "Плачет девушка в автомате", "Восьмое марта" жана "Таня плюс Володя" аталышындагы ырлары өзгөчө популярдуу болгон. Ал 1980-жылдары "Браво" тобунун курамында чыгармачылыкка аралашып, кийинчерээк жеке ырчы катары ырдап баштаган. Акыркы жолу 2016-жылы "Разлука" аталышындагы альбомун чыгарган.