АКШда үй-бүлөлүк селфи жаранды абакка отуруудан сактап калды

Техастын жашоочусу Кристофер Прекопия айыпталып жаткан кылмышка эч кандай тиешеси жок экенин селфинин жардамы менен далилдеди. Бул тууралуу чет элдик басылмалар жазып чыгышты.

Маалыматка караганда, жигит анын мурунку сүйлөшкөн кызынын өмүрүнө кол салууга шектелип жаткан. Кыз полицияга кайрылып Кристофер анын үйүнө кирип аны сабап, андан соң кагаз кескен бычак менен анын төшүнө жазганын айткан.

"Айып Кристоферге кыздын сөзүнө таянып тагылган. Ал эми жигит ал күнү үй-бүлөсү менен эс алууда болгонун айткан, буга карабай полиция аны камакка алган. Өз кезегинде айыптоочулар соттон Кристоферди 99 жылга эркинен ажыратууну талап кылышкан", - деп жазылат маалыматта.

Кристофердин кылмышка эч кандай тиешеси жок экенин анын апасы далилдеп берген. Ал кызга кол салуу болгон күнү үй-бүлөсү менен ресторанда тамактанып, сүрөттү социалдык тармактагы баракчаларына жүктөгөнүн айткан. Полиция кызматы кайрадан териштирүү иштерин жүргүзүп баланын кылмышка эч кандай тиешеси жок экенин аныкташкан.

Ал эми кыз бардык нерсени мурунку жигитинен өч алуусу үчүн ойлоп чыгарганын моюнуна алган.