Бүгүн футбол боюнча Кыргыз улуттук курама командасы Японияга каршы жолдоштук беттеш өткөрөт (акыркы оюндардын жыйынтыгы)

Бүгүн, 20-ноябрда Япониянын Тойота шаарында футбол боюнча Кыргыз улуттук курама командасы Япониянын курамасына каршы жолдоштук беттеш өткөрөт.

Кыргыз улуттук курама командасы БАЭде өтүүчү Азия Кубогуна кызуу даярдык көрүүдө. Кыргыз футболчулары акыркы 3 айда 3 жолдоштук беттеш өткөрүп, анда 2 жолу жеңишке жетүү менен, 1 беттеш тең чыгуу менен аяктаган. Анда Александр Крестининдин шакирттери Палестина курамасы менен 1:1 эсебинде тең чыгып, Сирия курамасын 2:1 эсеби менен жана Малайзия курамасын 1:0 эсебинде утуп алган.

Кечээ, 19-ноябрда Кыргыз улуттук курама командасы Японияга каршы оюн өтүүчү "Тойота" стадионунда машыгуусун өткөрүп, башкы машыктыруучу Александр Крестинин оюн алдындагы маалымат жыйынга катышты. Ал бүгүнкү беттеш тууралуу төмөнкүлөрдү айтты: "Бул беттеш Кыргыз жана Япон курамалары үчүн Азия Кубогуна даярдык катары өтүүдө. Албетте, ар бир машыктыруучунун өзүнүн милдеттери бар. Биз аны чечип жатабыз. Биздин маселе Азия Кубогунда колдоно турган идеяларды ишке ашыруу. Ал идеялар кандай ишке ашып, футболчулар аны кандай кабыл ала турганын көрүү керек. Ошондой эле Азия Кубогуна даярдануунун акыркы бөлүгүнө футболчуларды тандап калуу болот", - дейт машыктыруучу.

Башкы машыктыруучу Александр Крестинин бул жолдоштук беттешке 23 оюнчуну алып барган. Алардын арасында жаракаттан улам 1 жыл курамга чакырылган Виктор Майер жана жаракаттан улам Малайзияга каршы беттешке чыкпай калган Виталий Люкс бар. Бирок бул беттешке жаракат алган Азамат Байматов, Мирлан Мурзаев жана Антон Землянухин катышпайт.

Кыргыз улуттук курама командасынын тизмеси төмөнкүдөй болду:

• Дарбазачылар:
  • Павел Матяш (клубу жок), Кутман Кадырбеков ("Дордой"), Калыс Акималиев ("Абдыш-Ата").
• Коргоочулар:
  • Тамирлан Козубаев, Авазбек Откеев, Мустафа Юсупов (бардыгы "Дордой" футболдук клубунан), Шерзот Шакиров (“Нефтчи”), Айзар Акматов (“Алга”), Даниэл Тэго (“Читтагонг Абахани”, Бангладеш), Виктор Майер (“Виденбрюк”, Германия), Вениамин Шумейко (“ЮиТМ”, Малайзия)
• Жарым коргоочулар:
  • Азиз Сыдыков, Муролимжон Ахмедов, Кайрат Жыргалбек уулу, Бекжан Сагынбаев, Фархат Мусабеков, Ислам Шамшиев (бардыгы "Дордой" футболдук клубунан), Бахтияр Дүйшөбеков (“Башундхара Кингз”, Бангладеш), Ахлидин Исраилов (клубу жок), Эдгар Бернхардт (“Тыхы”, Польша), Турсунали Рустамов (“Алга”).
• Чабуулчулар: Виталий Люкс ("Ульм 1846", Германия), Эрнист Батырканов (“Дордой”).