Бишкекте соода борборунун коопсуздук кызматкерлери кардарды ур-токмокко алганы боюнча териштирүү иштери жүрүүдө

Бишкектеги соода борборлордун биринен коопсуздук кызматкерлери кардарды ур-токмокко алганы боюнча териштирүү иштери жүрүүдө. Бул тууралуу бүгүн, 21-ноябрда SUPER.KG порталына шаардык милициядан билдиришти.

Маалыматка ылайык, милицияга арыз менен И.М. аттуу шаар тургуну кайрылган. Анда ал 17-ноябрь күнү түнкү саат 23:40 чамасында Киев көчөсүндө жайгашкан соода борборунан аны коопсуздук кызматынын бир нече кызматкери ур-токмокко алганын билдирген. Ошондой эле ал адамдарды жоопко тартууну өтүнгөн.

Шаардык милициядан билдиришкендей, бул факт Биринчи Май РИИБинде катталып, соттук-медициналык экспертиза дайындалган. Териштирүү иштеринин алкагында соода борборунун коопсуздук кызматкерлери арыз берүүчү мас абалында аларга орой мамиле жасаганын билдиришкен. Учурда бул факт боюнча иликтөө иштери жүрүүдө.