Чүйдө белгисиз жарандардын кол салуусунан жабыркаган ата-балага операция жасалды

Чүй облусунда белгисиз жарандардын кол салуусунан жабыркаган ата-балага операция жасалганын SUPER.KG'ге Токмок шаарындагы аймактык оорукананын директору Бактыгүл Исаева кабарлады. Анын айтымында, 12 жаштагы баланын абалы жакшырганы менен, атасы дале өзүнө келе элек.

"Биздин ооруканага үй-бүлө мүчөлөрү оор абалда келишкен. Тактап айтканда, аялы-күйөөсү жана алардын баласы. Биз ошол замат ата-баланы жандандыруу бөлүмгө жаткырганбыз. 18-ноябрь күнү 12 жаштагы балага жана анын 40 жаштагы атасынын башына операция жасалды. Учурда бала сүйлөп калды жана абалы туруктуу болгондуктан палатага котордук. Атасынын абалы бир аз оор, өзүнө келе элек. Ал эми апасынын абалы жакшы. Бизге жеткен маалыматтар боюнча, кол салууга кирген адамдар, аларды айрынын сабы менен сабашкан", - деди Бактыгүл Исаева.

Эске салсак, 17-ноябрь күнү болжол менен саат 03:55 чамасында Чүй райондук ички иштер бөлүмүнө Дөӊ-Арык айылындагы үй-бүлөгө кол салуу болгону тууралуу кабар түшкөн. Аталган жерге ыкчам тергөө тобу барып, окуянын чоо-жайын такташкан.