Баткенде жол кыймылынын коопсуздугун камсыздоо бөлүмүнүн инспекторун айдоочу отвёртка менен сайып салды

Баткенде жол кыймылынын коопсуздугун камсыздоо бөлүмүнүн инспекторун отвёртка менен сайып кетишти. Бул тууралуу маалыматты бөлүмдүн басма сөз кызматынан тастыкташты.

Белгилүү болгондой, окуя 19-ноябрда болгон. Анда инспектор жол эрежесин бузган айдоочуну токтоткон учурда ал буйрукка баш ийбей качып кеткен.

"Инспектор качып кеткен айдоочунун артынан кууп барып кармаган. Айдоочу мас абалында болгону аныкталган. Унааны атайын токтотуучу жайга киргизген учурда ал инспекторду отвёртка менен көкүрөккө сайып жиберген", - деп билдирди маалымат кызматы.

Окуя болгон учурда бөлүмдүн башка кызматкерлери кесиптешине жардам көрсөтүп, аны ооруканага жеткиришкен. Айдоочу кармалып, азыркы тапта испектордун абалы жакшы экенин жана аталган факт боюнча кылмыш иши козголгонун маалымат кызматы кошумчалады.