Дисней киностудиясы "Падыша арстан" мультфильминин негизинде тартылган тасмасынын тизерин жарыялады

Walt Disney Studios киностудиясы "Падыша арстан" мультфильминин негизинде тартылган тасмасынын тизерин жарыялады. 22-ноябрда жүктөлгөн тизерди бир сутканын ичинде көргөн колдонуучулардын саны 6 миллионго жакындады. Тасманын 1994-жылы тартылган мультфильми дүйнөгө кеңири таанымал.

Режиссёр Жон Фавронун "Падыша арстан" мультфильминин жаңыланган версиядагы тасмасы көрүүчүнү Африка саваннасына алып барат. Кызыктуу сюжетте жапайы дүйнөнүн болочоктогу падышасы өзүнүн "Сыймык аскасына" жетүү үчүн кандай чыккынчылыктарды, трагедияны башынан өткөрөрү көрсөтүлөт. Аталган тасма 2019-жылдын жай айларында кинотеатрларга чыгарылат.

22-ноябрда чыккан тизерде жапайы дүйнөдөгү бардык жаныбарлар чогулуп болочоктогу падышаны көрүүгө келишет. Жаныбарлардын аксакалы атанган маймыл Рафики жаңы төрөлгөн болочок падышаны "Сыймык аскасына" алып чыгып айбанаттарга көрсөтөт. Тизерде тасманын 1994-жылы чыккан мультфильминде колдонулган "Жашоо айлампасы" саундтреги ойнолот.