Бурулайдын өлүмү боюнча соттук отурумда жабырлануучу тарап менен соттолуучулардын жакындары эки жаат болуп жаңжалдаша кетишти

Бүгүн, 23-ноябрда Бишкек шаарынын Свердлов райондук сотунда ала качуунун курмандыгы болгон Бурулай Турдали кызынын өлүмү боюнча кезектеги соттук отурум орун алды. Анда соттолуучулардын бири Марс Бөдөшовдун досу Акмат Сеитов көрсөтмө берди. Анын берген көрсөтмөсүн Бурулай Турдали кызынын жакындары чындыкка дал келбейт деп чырдап чыгышты. Соттолуучулардын тарапташтары менен жабырлануучу тараптын ортосунда кайым айтышуу болуп, жаңжал чыгып кетти. Тартипти соттук отурумду көзөмөлдөөчү конвойлор жөнгө салып, эки жакты ажыратып калышты.

Окуянын чоо-жайына кайрылсак: Ушул жылдын 27-май күнү Бишкек шаарында жигит кызды ала качып бара жаткандыгы боюнча милицияга маалымат түшкөн. Көп узабай жигит менен кыз бара жаткан унаа Сосновка айылындагы посттон токтотулуп, Жайыл райондук ички иштер бөлүмүнө жеткирилген.

Милиция бөлүмүндө жигит кызга, андан соң өзүнө бычак сайып, оор абалда экөө тең ооруканага жеткирилген. Кыз алган жаракатынан улам көз жумган. Каза болгон кыз 20 жаштагы Бурулай Турдали кызы, ал эми жигит 29 жаштагы Марс Бөдөшов экендиги анык болгон.

Бурулай Турдали кызы борбор шаардагы медициналык окуу жайлардын биринде окуй тургандыгын жана ушул жылдын август айында Марс Бөдөшовго эмес, башка жигитке турмушка чыгууга даярданып жатканын жакындары айтып беришкен.