Ала качуунун курмандыгы болгон Бурулай Турдали кызынын портрети медициналык колледждин жатаканасынын имаратына түшүрүлдү

Ала качуунун курмандыгы болгон Бурулай Турдали кызынын портрети Бишкектеги Медициналык колледждин жатаканасынын имаратына түшүрүлдү. Портретти "DOXA" арт тобунун мүчөлөрү тартышкан.

Белгилүү болгондой, бул эмгек гендерлик көйгөй, анын ичинде турмуш куруу максатында ала качуу аркылуу кыз-келиндерге көрсөтүлгөн зомбулукка коомчулуктун көңүлүн бурдуруу үчүн ишке ашырылган. Ошондой эле "Аялдарды колдоо борбору" коомдук бирикмесинин адам укуктарынын эл аралык күнүнө карата 25-ноябрдан 10-декабрга чейин өтө турган иш-чараларынын башталышы катары белгиленген.

Медициналык колледждин директору Чолпон Усубалиеванын айтымында, Бурулай Турдали кызынын портрети коомчулуктагы орчундуу көйгөйдү көрсөтүп, жаштарды туура жолду тандоосу керектигин эскертип турат.

"Ала качуу өлкөбүздөгү аябай коркунучтуу социалдык көйгөй болуп калууда. Салт деп да айтып келишет, бирок бул андай эмес. Ушул көрүнүш менен канчалаган кыргыз кыздарынын тагдыры талкаланып жатат. Алардын кыялдары кыйылып, билим алуу, тандоо эркиндиги чектелип жатат. Бурулай бизде окуп билим алууну, акушер болууну каалаган эле. Туугандарына, курбуларына кандай оор болгонун көрдүк. Мындай нерсе кайталанбасын. Бул трагедия жаштардын, коомчулуктун оюн өзгөртөт деп ишенем. Бир нерсе жасоонун алдында ойлонуп туура жолго баргыла", - деди ал.