Англияда үйдөгү 2 ит жаңы төрөлгөн ымыркайга кол салып ал оор абалда. Иттер да, ата-энеси да камакка алынды

Чет элдик маалымат булактары жазгандай, англиялык 31 жаштагы Ден Макналти балалуу болор алдында коңшулары ал багып жүргөн тукумдагы (стаффордширский бультерьер) ит бала үчүн кооптуу экенин бир нече жолу эскертишкен. Бирок иттердин кожоюнуна алардын бул кеңеши жакпай: "Иттер да биздин балдарыбыз" деп ачуулуу жооп берген.

Көп өтпөй, 18-ноябрда анын үй-бүлөсүндө кайгылуу окуя орун алды. Иттер Макналтинин али 1 ай боло элек ымыркайына кол салып, бала оор абалда ооруканага түшкөн.

"Анын аялы Эми кош бойлуу кезинде мен Денден "Бала төрөлсө иттериңди эмне кыласың?" деп сурасам, ачуусу келген тейде "алар да биздин балдар" деп жооп берген", - деген коңшуларынын бири.

Ымыркайдын чоң атасы бул кырдаалды түшүндүрө алгыс жаман окуя деп атап, буга чейин иттер бир да жолу адамга кол салбаганын айткан. Ошондой эле ал бул жерде ымыркайдын ата-энесинин күнөөсү жок экенин, алар учурда баласынын өмүрүнөн кам санап жатышканын билдирген.

Ал эми баланын апасы баары бир иттерди жаман көрбөстүгү айтылат маалыматта. Эки ит жана балага жетиштүү кароо болбогондугу үчүн ата-энеси камакка алынып, кийин аялы менен күйөөсү үй камагына чыгарылган. Учурда дарыгерлер баланын өмүрүн сактап калуу үчүн күрөшүп жатканы менен анын абалы оор бойдон калууда.