Жактоочу: "Садыр Жапаровдун иши жаңы жагдайларга байланыштуу кайра карала турган болду"

Камакта отурган мурдагы депутат Садыр Жапаровдун иши жаңы жагдайларга байланыштуу кайра каралат. Бул тууралуу SUPER.KG'ге анын жактоочусу Шарабидин Токтосунов 26-ноябрда кабарлады. Жактоочунун айтымында, Жапаровдун күнөөсүз экенине далил болуп бере алчу видеокайрылууларды Бишкек шаардык прокуратурасы карап чыгып, кошумча текшерүү жүргүзүү үчүн материалдарды Биринчи Май райондук прокуратурасына өткөрүп берди.

"Бишкек шаардык прокуратурасы видеокайрылууларды карап чыгып, Биринчи Май райондук прокуратуранын 29-августта "жаңы жагдайлар жок" деп чыгарган токтомун бузду жана кайра кошумча текшерүү жасап, мыйзамдуу чечим кабыл алууну тапшырды. Эми райондук прокуратура кошумча текшерүүдөн кийин ишти кайра карап чыгууну райондук сотко өткөрүп берет", - деди Токтосунов.

Садыр Жапаров 2013-жылдын 7-октябрында Каракол шаарында "Кумтөр" боюнча нааразычылык акциясындагы баш аламандыкты уюштурууга күнөөлөнүп, 2017-жылдын 25-мартында Кыргыз-Казак чек арасынан кармалып, камакка алынган.

2017-жылдын 2-августунда Жапаров Биринчи Май райондук сотунун өкүмү менен "барымтага алуу" беренеси боюнча күнөөлүү деп табылып, 11 жыл 6 айга эркинен ажыратылган. Райондук соттун өкүмүн Бишкек шаардык соту жана Жогорку Сот күчүндө калтырган. Жапаров учурда Чүй облусунун Молдовановка айылындагы №1-колонияда жазасын өтөп жатат.