Бүгүн Бишкекте Каныбек Осмоналиевдин байгелерине арналган оор атлетика боюнча эл аралык мелдеш башталат

Бүгүн, 26-ноябрда Бишкек шаарындагы Каба уулу Кожомкул атындагы Спорт Ордосунда Каныбек Осмоналиевдин байгелерине арналган оор атлетика боюнча эл аралык мелдеш старт алат. Бул тууралуу Жаштар иштери, дене тарбия жана спорт мамлекеттик агенттиги маалымдады.

Маалыматка ылайык, аталган мелдешке Орто Азиядан, жакынкы жана алыскы чет өлкөлөрдөн спортчулар келип катышып, байгелер үчүн күч сынашат. Эркектер арасындагы мелдеш үчүн спортчулар салмак боюнча 8 категорияга, ал эми кыз-келиндер 7 категорияга бөлүнгөн.

Мелдеш Бишкек убактысы боюнча саат 10:00дө башталып, саат 17:30да мелдештин салтанаттуу ачылыш аземи орун алат.

2017-жылы өткөрүлгөн мелдештин сүрөттөрүн бул шилтемеден жана мелдештин жыйынтыгын бул шилтемеден окуй аласыздар.

Каныбек Осмоналиев оор атлетика боюнча дүйнөнүн 4 жолку, Европанын 2 жолку чемпиону. 1980-жылы Москвада өткөн Олимпиадада чемпион болгон. СССРдин эмгек сиңирген спорт чебери.