Дастан Бекешев "кыйноого кабылды" делген кытайлык кыргыздардын абалын билүү үчүн ТИМге кат жиберди

Кытайдагы кыргыздардын абалын билүү үчүн депутат Дастан Бекешев Тышкы иштер министрлигине кат аркылуу кайрылганы тууралуу маалымат тараган. Аталган маалыматты SUPER.KG порталына депутат өзү тастыктады.

"Кытайдагы кыргыздар бийликтен кордук көрүп жатканы тууралуу чыккан маалыматтарды тактоо, зарыл болсо Пекинге нота жиберүү керек болот. Кытайдын кыргыз, казак улутундагы жарандары "саясий тарбия берүүчү лагерлерде" кармалып жатканы тууралуу кабарлар соңку күндөрү көп чыга баштады. Буга чейин Казакстан Кытайга нота жиберип, расмий сүйлөшүүлөрдү жүргүзүп, ондогон казак түрмөдөн бошотулган. Кыргыз бийлиги Кытайдагы кыргыздардын укуктары боюнча дипломатиялык ыкмаларды колдоно элек. Биздин туугандарыбыздын канчасы түрмөдө экенин билип, кабар алуубуз зарыл" - деп билдирди Бекешев.

26-ноябрда Кытайдан Кыргыз мамлекетине келген кайрылмандар жана кытайлык кыргыздардын жакындары президент Сооронбай Жээнбековго жардам сурап кайрылышкан.

Мындан тышкары Дастан Бекешев Тышкы иштер министрлигине кайрылган катына жооп ала электигин айтып, жооп келсе ишти дароо колго аларын кошумчалады.