Башкы прокуратура Баткен облусунун прокурору болуп Улук Өмүрзаков дайындалганы тууралуу маалыматты четке какты

Буга чейин бир канча маалымат булактарында Улук Өмүрзаков Баткен облусунун прокурору болуп дайындалганы тууралуу маалымат тараган. Ал эми маалыматты тастыктоо үчүн Башкы прокуратурага байланышканыбызда, алар бул маалыматты четке кагышты.

"Азыркы тапта Баткен облусунун прокурорунун милдетин аткаруучу болуп Ороз Бердибаев иштеп жатат. Ал эми Улук Өмүрзаковдун бул кызматка дайындалышы тууралуу маалымат чындыкка дал келбейт", - деп билдирди маалымат кызматы.

Улук Өмүрзаков ички иштер министринин орун басары Сүйүн Өмүрзаковдун иниси жана "Мухаммад Умар" спорт клубунун жетекчиси.

Эскерте кетсек, Баткен облусунун мурдагы прокурору 43 жаштагы Анарбай Мамажакыповдун өлүмүнөн кийин кылмыш иши козголуп, кылмышка шектүү катары М.Калыков 2 айга кармалган.

Ошондой эле кылмыш болгон күнү Баткен облусунун прокурору менен чогуу эс алган делген 2 орун басары, Баткен районунун прокурору жана 2 бөлүмдүн башчысы жумуштарынын убактылуу четтетилип сурак берип жаткандыгы маалымдалган.