Өлкөдө алты жыл аралыгында ден соолугунун мүмкүнчүлүгү чектелген адамдардын саны 27 пайызга өстү

Өлкөдө алты жыл аралыгында ден соолугунун мүмкүнчүлүгү чектелген адамдардын саны 27 пайызга өстү. Бул тууралуу бүгүн, 27-ноябрда Жогорку Кеңештин комитет жыйынында эмгек жана социалдык өнүктүрүү министри Улукбек Кочкоров билдирди.

Анын айтымында, 2011-жылы өлкөдө ден соолугунун мүмкүнчүлүгү чектелген адамдардын саны 142 миң адамды түзгөн. 2018-жылдын 1-январына карата 181 миң адамды түздү. "Алты жыл аралыгында ден соолугунун мүмкүнчүлүгү чектелгендердин саны 39 миң адамга көбөйгөн", - деди ал.

Учурда Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти комитетинин жыйыны уланууда. Анда "Бириккен улуттар уюмунун Башкы Ассамблеясы тарабынан 2006-жылдын 13-декабрында кабыл алынган жана 2011-жылдын 21-сентябрында кол коюлган Майыптардын укуктары жөнүндө БУУнун конвенциясын ратификациялоо тууралуу" мыйзам долбоору каралууда.