Тышкы иштер министри "Кытайда этникалык кыргыздар кыйноого кабылды" деген маалымат териштирилип жатканын айтты

Тышкы иштер министри "Кытайда этникалык кыргыздар кыйноого кабылды" деген маалымат териштирилип жатканын айтты. Министр Чыңгыз Айдарбеков аталган маалыматты журналисттердин суроолоруна жооп берип жатып билдирди.

Айдарбеков аталган маселеге аяр мамиле жасоо керектигин кошумчалады.

"Бул ички саясат. Маалыматтар азырынча тактала элек. Териштирүү иштери жүрүп жатат", - деди министр.

Аталган маселе бүгүн, 27-ноябрда парламенттин Эл аралык иштер, коргоо жана коопсуздук боюнча комитетинде жабык каралды.

26-ноябрда Кытайдан Кыргыз мамлекетине келген кайрылмандар жана кытайлык кыргыздардын жакындары президент Сооронбай Жээнбековго жардам сурап кайрылышкан. Ага чейин Кытайда жашаган этникалык кыргыздар "кайра тарбиялоочу лагерлерге" жиберилип жатканы тууралуу маалыматтар тараган.