Министрлик: "Бишкектеги балдар ооруканасына суткасына 500дөй бейтап кайрылууда"

Бишкек шаардык балдар ооруканасына медициналык тез жардам алуу үчүн суткасына 500дөй бейтап кайрылат. Бул тууралуу Саламаттыкты сактоо министрлигинин басма сөз кызматы кабарлады.

Маалыматка караганда, 4 кабыл алуу бөлүмүндө 2 педиатр, лор врач, хирург жана 2 травматолог иш алып барат. Акыркы үч апта аралыгында педиатрга кайрылгандардын саны 200гө жеткен. Алардын 85 пайызы өз алдынча келген болсо, 10 пайызы үй-бүлөлүк дарыгерлер борборунан багыттама менен келишкен. Дагы 5 пайызы "Тез жардам" аркылуу жеткирилгендер. Кайрылгандардан 10 бейтап ооруканага жеткирилсе, дагы ону жугуштуу оорулар ооруканасына жөнөтүлөт. Көпчүлүгүнө амбулатордук дарылануу жазылат.

"26-ноябрда жаңы диагноз коюучу бөлүм ишке кирди. Ал заманбап стандарттарга жооп берет. Кезек күтүүлөрдү жана нааразычылыктарды азайтуунун үстүндө иштеп жатабыз. Ага карабай бейтаптарды саны көп болуп, учурда 4 педиатр, 2 хирург жана 2 кулак-мурун дарыгери кабыл алышууда. Күтүү залында кичинекей бала менен 2-3 адам келип, адамдар чогулуп калышууда", - дейт шаардык балдар ооруканасынын башкы дарыгеринин орун басары Гүлнара Жанабилова.