Жалал-Абад мэриясы: "Мындан ары шаар жетекчилигинин уруксаты менен гана журналисттерге маалымат берилет "

Буга чейин социалдык тармактарда Жалал-Абад шаарынын мэринин буйругу социалдык тармактарда жарыяланып ага карата ар кандай кайчы пикирлер айтылып жаткан. Аталган буйрукта мэриянын кызматкерлери массалык маалымат каражаттарына кандайдыр бир маалымат берүүдөн мурда шаар жетекчилиги менен макулдашуусу зарыл экендиги жазылган.

Бул тууралуу Жалал-Абад шаардык мэриясына байланышканыбызда төмөндөгүлөрдү билдирди.

"Аталган буйрукта сөз жана басма сөз эркиндигин чектөө же Кыргыз Республикасынын жарандарынын мыйзамдуу укуктарын, эркиндиктерин басмырлоо жок. Болгону муниципалдык аймакта жетекчи кызматкерлердин иштөө, жүрүм-турум нормаларын тартипке салуу, маалымат таркатууну иреттештирүү, маалымат коопсуздугун жөнгө салуу аракети көрүлгөн. Ал эми тигил же бул маселелер боюнча маалымат берүүгө тыюу салуу жок, ал жерде макулдашуу тууралуу гана айтылган", - деп билдирди басма сөз кызматы.

Ошондой эле мэрия бул жерде эч кандай мыйзам бузуу жок экендигин социалдык тармактарда жана айрым жалпыга маалымдоо каражаттары коомчулукка аталган буйрукту бурмалап жеткирип жаткандыгын кошумчалады.

"Шаар аймагында бирдиктүү муниципалдык маалымат саясаты бар, ал эми айрым учурда бирдей эле фактыларды кызмат адамдары ар башкача интерпретациялап, маалымат берип коюшууда. Ушундай башаламандыктардын болбошун алдын алып маалымат таркатуу жагынан макулдашып иштөө жагы гана айтылган. Тилекке каршы, аталган маалыматты коомчулукка туура эмес жеткиргендер да болуп жатат", - дешти мэриядан.