ЖЭБдеги кырсык боюнча сотто "Улуттук энергетикалык холдингдин" өкүлү көрсөтмө берүүдө

Бүгүн, 29-ноябрда Биринчи Май райондук сотунда Бишкек ЖЭБиндеги өндүрүштүк кырсыкка байланыштуу козголгон 4 кылмыш иштин бирин кароо уланууда. Анда "Улуттук энергетикалык холдингдин" Генерация жана электр энергиясын берүү башкармалыгынын жетекчиси Таалайбек Байгазиев көрсөтмө берип жатат.

Байгазиев суроолорго жооп берип жатып ЖЭБдеги өндүрүштүк кырсыктын келип чыгышы катардагы кызматкерлердин катачылыгынан улам келип чыкканын белгиледи.

"Өндүрүштүк кырсык ЖЭБдин нөөмөттөгү кызматкерлеринин катачылыгынан улам болуп калды. Дыкат даярдык көрүүлөрү керек болчу. Өндүрүштүк кырсыктан кийин Орусиядан келген адистер дагы маселе ушуга байланыштуу болгонун белгилешкен. Бирок 23-январда Өзгөчө кырдаалдар министрлиги аба ырайы боюнча маалымат таратканда биз энергетика тармагы боюнча онлайн түрүндө жыйын өткөргөнбүз. Анда докладдар окулуп, отчёттор берилген. Бирок ЖЭБдеги маселелер боюнча маалыматтар берилген эмес", - деди Байгазиев.

"Бишкек жылуулук" менен "Электр станциялары" ишканасы ЖЭБдеги кырсыкты жөнгө салууда келтирилген чыгымдар боюнча энергетика тармагындагы ишканалардын мурунку жетекчилери Айбек Калиев, Бердибек Боркоев, Узак Кыдырбаев, Темирлан Бримкулов, Нурлан Өмүркул уулу, Нургазы Курманбеков жана Нурлан Садыковдон ЖЭБдеги кырсыкка байланыштуу 89 миллион сомдон ашык акча өндүрүп берүүнү талап кылууда.

Козголгон кылмыш иштин негизинде "Улуттук энергетикалык холдингдин" мурдагы башчысы Айбек Калиев, "Электр станциялары" ишканасынын жетекчисинин мурдагы орун басары Бердибек Боркоев, “Электр станцияларынын” мурдагы директору Узак Кыдырбаев жана ЖЭБди модернизациялоо долбоорунун аткаруучу директору Темирлан Бримкулов УКМКнын тергөө абагында, ал эми калган үчөө үй камагында.

Ушул жылдын 26-январында Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Андан кийин ЖЭБди жаңылоого Кытайдан алынган 386 миллион доллар насыя туура эмес пайдаланганы ачыкка чыгып, 4 кылмыш иши козголгон. Анын негизинде энергетика тармагындагы ишканалардын жетекчилеринен тышкары мурдагы өкмөт башчылар Жантөрө Сатыбалдиев, Сапар Исаков, депутат Осмонбек Артыкбаев кармалган. Алар учурда УКМКнын тергөө абагында.