Бишкек ЖЭБдеги кырсык боюнча сотто күбөлөр суралды

Бүгүн, 29-ноябрда Биринчи Май райондук сотунда Бишкек ЖЭБиндеги өндүрүштүк кырсыкка байланыштуу козголгон кылмыш иштин бирин кароо улантылды. Сот отурумунда "Улуттук энергетикалык холдингдин" Генерация жана электр энергиясын берүү башкармалыгынын жетекчиси Таалайбек Байгазиев, өкмөттүк аппараттын Отун энергетикалык комплексти жөнгө салуу боюнча бөлүмүнүн кызматкери Адилет Акматалиев жана Экологиялык жана техникалык коопсуздук боюнча мамлекеттик инспекциясынын өкүлү Данияр Сакиев көрсөтмө беришти.

Алар өндүрүштүк кырсыкта ЖЭБдин нөөмөттөгү кызматкерлери өз учурунда ыкчам аракет жасабаганын, абалды чукул арада калыбына келтирүү мүмкүн болгондугун, бирок жабдыктар жайгашкан бөлүктө терезелердин жана чатырдын жок экени маселени курчуткандыгын билдиришти.

Ишти карап жаткан судья отурумду 4-декабрда улантууну чечти.

"Бишкек жылуулук" менен "Электр станциялары" ишканасы ЖЭБдеги кырсыкты жөнгө салууда келтирилген чыгымдар боюнча энергетика тармагындагы ишканалардын мурунку жетекчилери Айбек Калиев, Бердибек Боркоев, Узак Кыдырбаев, Темирлан Бримкулов, Нурлан Өмүркул уулу, Нургазы Курманбеков жана Нурлан Садыковдон ЖЭБдеги кырсыкка байланыштуу 89 миллион сомдон ашык акча өндүрүп берүүнү талап кылууда.

Козголгон кылмыш иштин негизинде "Улуттук энергетикалык холдингдин" мурдагы башчысы Айбек Калиев, "Электр станциялары" ишканасынын жетекчисинин мурдагы орун басары Бердибек Боркоев, “Электр станцияларынын” мурдагы директору Узак Кыдырбаев жана ЖЭБди модернизациялоо долбоорунун аткаруучу директору Темирлан Бримкулов УКМКнын тергөө абагында, ал эми калган үчөө үй камагында.

Ушул жылдын 26-январында Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Андан кийин ЖЭБди жаңылоого Кытайдан алынган 386 миллион доллар насыя туура эмес пайдаланганы ачыкка чыгып, 4 кылмыш иши козголгон. Анын негизинде энергетика тармагындагы ишканалардын жетекчилеринен тышкары мурдагы өкмөт башчылар Жантөрө Сатыбалдиев, Сапар Исаков, депутат Осмонбек Артыкбаев кармалган. Алар учурда УКМКнын тергөө абагында.