Депутат: "Билим берүү министрлиги уялбай мектеп окуучуларына катасы көп китепти басып чыгарууда"

Бүгүн, 29-ноябрда парламенттик жыйында депутат Эльвира Сурабалдиева китептердин сапаты боюнча Билим берүү министрлигине нараазычылыгын билдирди.

"Мектеп окуучуларына жаңы басылып чыккан биология окуу китебинде каталар көп экен. Эмнеге көңүл бурулган жок? Ошондой ката менен окуган мектеп окуучуларынан кандай келечекти күтсөк болот?" - деп каражаттын ыгы жок чачылып жатканын айтты эл өкүлү.

"Билим берүү министри Гүлмира Кудайбердиева ушундай ката менен китеп чыгаргандан уялган жоксуңарбы? Грант менен келген каражат деп эле чача бересиңерби? Өлкөнүн бюджетине зыян келтирип жатасыңар. Эл алдына чыгып, ушул кетирген катаңыз тууралуу кечирим сурадыңызбы?" - деди Сурабалдиева.

Билим берүү жана илим министри Гүлмира Кудайбердиева мектеп окуучуларына берилген китептеги ката тууралуу жалпыга маалымдоо каражаттары аркылуу түшүндүрүү иштерин жүргүзгөнүн билдирди.