Бишкекте эс-учун жоготкон абалда жаткан адамдын капчыгынан 400 миң сом табылды

Бишкекте эс-учун жоготкон абалда жаткан адамдын капчыгынан 400 миң сом табылып, аны "Тез жардам" кызматынын дарыгерлер тобу эсептеп жатканы тартылган видео интернетке тарады.

Бишкектеги медициналык "Тез жардам" станциясынын Кайра жандандыруу бөлүмүнүн башчысы Егор Борисов бул боюнча SUPER.KG'ге түшүндүрмө берди. Анын айтымында, 2-3 күн мурун борбордогу көчөлөрдүн биринде белгисиз адам эс-учун жоготкон абалда жатканы боюнча чалуу болуп, ал жерге дарыгерлер тобу барган.

"Видеодогу окуя кайсы жерде болгонун жана ал жердеги адамдар тууралуу маалымат бере албайм. Бирок дарыгерлер эс-учун жоготкон абалда жаткан адамдын жанынан ири көлөмдөгү акчаны табышканы чын. Кийин маселе жаралбашы үчүн милиция жана жакындарынын алдында акчаны санап чыгышкан. Негизинен дарыгерлер ооруп жаткан адамды көчөдөн алып кетсе, анын жанындагы буюмдарын сөзсүз текшерип чыгып акт толтурушат", - деди Борисов.