УКМК кызматкерлерине жаӊы батирлердин ачкычы тапшырылды

Бүгүн, 1-декабрда Жогорку Кеңештин төрагасы Дастанбек Жумабеков Улуттук коопсуздук мамлекеттик комитетинин кызматкерлери үчүн Каракол шаарында курулган көп кабаттуу үйдү пайдаланууга берүү салтанатына катышты. Бул тууралуу парламенттин басма сөз кызматы билдирди.

Спикер жаӊы турак-жайга ээ болгон УКМК кызматкерлерин куттуктады. "Бүгүнкү салтанаттуу иш-чара баарыбыз үчүн өтө маанилүү. Анткени мурда турак-жайга муктаж кызматкерлер үчүн көп кабаттуу үйлөр Бишкек шаарында гана курулуп келсе, акыркы жылдары аймактарда салына баштады. "Аймактарды өнүктүрүү" жылында мамлекет тарабынан алыскы райондордогу жашоо-турмушту жакшыртууга өзгөчө көӊүл бурулууда. Мындан ары да эл аралык терроризмге, радикализмге, экстремизм жана баңгизат трафигине каршы күрөш ырааттуу жүргүзүлүп, мамлекетибиз өнүгө берет деген үмүттөбүз. Ошондой эле күч түзүмдөрү жана мамлекеттик кызматкерлер, мугалимдер менен дарыгерлер үчүн көп кабаттуу үйлөрдү куруу салты улантылышы керек", - деди Жумабеков.

Салтанаттын алкагында Дастанбек Жумабеков УКМК кызматкерлерине батирлердин ачкычтарын тапшырып, балдар аянтчасынын курулушу үчүн 100 миӊ сом акча каражатынын сертификатын берди.