Ысык-Көлдөгү 3 шаарды таза суу менен камсыз кылуу үчүн 29 миллион доллар насыя алынууда

Бүгүн, 3-декабрда Жогорку Кеңештин Бюджет жана финансы боюнча комитетинин жыйынында Ысык-Көл облусундагы Балыкчы, Чолпон-Ата, Каракол шаарларында саркынды сууларды тазалоо маселеси каралды.

Таза суу менен камсыздоо жана саркынды сууларды чыгаруу департаментинин башчысы Аскарбек Токтошевдин айтымында, "Азия өнүктүрүү банкы" бул багытта 41,87 миллион доллар өлчөмүндө каражат бөлүүгө даяр.

"Бул каражаттын 12,84 миллион доллары грант, калганы жеӊилдетилген насыя болуп саналат. Насыя 32 жылга берилүүдө", - деди Токтошев.

Кийинчерээк ушундай эле долбоор Нарын шаарында да ишке ашырыла турганы белгилүү болду. Талкуунун жыйынтыгында аталган комитет насыялык жана гранттык макулдашуулардын долбоорун жактырды.