Дарыгерлер жашап кетерине 30 пайыз гана кепилдик берип жаткан Мээргүл Анарбек кызы бүгүн мекенине кайтып келет

Дарыгерлер жашап кетерине 30 пайыз гана кепилдик берип, боорун алмаштыруу үчүн Индияга учуп кеткен Мээргүл Анарбек кызы мекенине кайтып келет. Бул тууралуу бүгүн, 4-декабрда SUPER.KG порталына "Ак ниет - Аманат" коомдук кайрымдуулук фондунун жетекчиси Медер Сапарбаев билдирди.

Маалыматка караганда, бейтап бүгүн Бишкек убактысы боюнча саат 12:00дө Индиядан учуп, Алматы шаары аркылуу Кыргыз өлкөсүнө келет.

"Артта көптөгөн кыйынчылыктар калды. Мындан ары да мекендешибиздин тагдырына кайдыгер карабай жардам берип турабыз", - деди Сапарбаев.

Буга чейин Мээргүлдун апасы Шаангүл Таштанбекова коомчулукка кайрылып кайдыгер эмес адамдардан жардам сураган. Кайрымдуу адамдар акча каражатын топтоп берип, Индияга бооруна операция жасатуу үчүн учуп кеткен. Операция 13 саатка созулуп, андан ийгиликтүү чыккан Мээргүл 1 ай аралыгында дарыгерлердин көзөмөлүндө Индияда болгон.