Кыш келерде үйүн 60 миң сомго саткан тургун: "Сот чечими күчүнө кирип, эки кызымды алып үйдөн чыгып кеттим"

Буга чейин Токмок шаарынын 52 жаштагы тургуну Фарида Раимова 1 бөлмөлүү үйүн Улан Байкабылов аттуу жаранга 60 миң сомго сатып жиберип мектеп курагындагы эки кызы менен барарга жер таппай жатканын айтып SUPER.KG'ге кайрылган. Үйдү бошотуп берүү боюнча сот чечими 1-декабрда күчүнө кирип, Раимова эки кызы менен үйдөн чыгып кеткенин 5-декабрда кабарлады.

"Токмок шаардык сотунун чечими күчүнө кирип, 2-декабрда сатып жиберген үйүбүздү Байкабыловго бошотуп бердик. Бошотуп бербөөгө аргам жок болуп калды. Анткени облустук сотко даттанайын десем, менде жетиштүү документтерим жок экен. Адвокаттар да кандай учур болбосун утулуп кала турганымды айтышты. Ошондуктан Байкабылов менен кайрадан сүйлөшүп, ал колума 20 миң сом берди. Ал акчага башка жайдан ижарага батир алдык. Азыр ошол жакта жолдошум жана эки кызым менен бирге жашап жатабыз. Бирок өзүм жакында Түркияга иштөөгө кетип жатам", - деди Раимова.