Транспорт жана жолдор министринин орун басары 50 миң доллар пара менен кармалды

Транспорт жана жолдор министринин орун басары ири көлөмдөгү пара менен кармалды. Бул тууралуу УКМКнын маалымат кызматы кабарлады.

Маалым болгондой, 5-декабрда УКМКнын Коррупцияга каршы күрөшүү кызматы козголгон кылмыш иштин негизинде Транспорт жана жолдор министринин Ж.А. аттуу орун басарын 50 миң доллар пара алып жаткан жеринен кармашкан.

Жогорудагы акча "Бириктирүүчү жолдор, 1 жана 3 ЦАРЭС коридору, Эпкин-Дыйкан тилкеси (Башкууганды 89,5-159,2 чакырымдары)" долбоору боюнча тендерде чет өлкөлүк компаниялардын биринин кызыкчылыгын көздөө максатында алынып жаткан. Кармалган чиновник аталган тендерге төрагалык кылып, чет өлкөлүк компаниялардын биринин кызыкчылыгын көздөгөндүгү айтылат маалыматта.

"Ал үчүн жалпы 520 миң доллар берүүнү талап кылган. Буга чейин ал белгиленген сумманын 120 миң долларын ортомчу аркылуу алган. Ал ортомчу министрдин орун басарынын өзүнүн тууганы болгон. Ал эми акчанын калган бөлүгүн кийинки апталардан алууну пландаган", - деп жазылат УКМКнын маалыматында.

Учурда министрдин орун басары УКМКнын кармоочу жайына киргизилип, тергөө иштери улантылууда.

Транспорт жана жолдор министринин орун басарынын кызмат ордун 2017-жылдын февраль айынан бери Азимкан Жусубалиев ээлеп келет.