Чаткалдагы чырдан кийин ишин токтоткон "Эти Бакыр Терек-Cай" ишканасынын жетекчиси билдирүү таратты (толукталды)

"Эти Бакыр Терек-Cай" компаниясы Чаткал районунда өз ишин убактылуу токтоткондугуна байланыштуу бүгүн, 6-декабрда билдирүү таратты. Анда ишкананын аянтынан сурьма кенин мыйзамсыз казып жүргөн адамдардын үгүттөөсүнөн улам жумушчулар ишке чыкпай койгондугу жана буга байланыштуу ишти токтотууга аргасыз болгону жазылган.

"Азыркы күндө 350дөн ашык адам жумуш менен камсыз болгон. Анын 96 пайызы жергиликтүү жашоочулар. Орточо эмгек акы 22 миң 500 сомду түзөт. Ишкана 2016-жылдан баштап бүгүнкү күнгө чейин Кыргыз Республикасынын бюджетине 750 миллион сомдон ашык салык төктү", - деп айтылат Тезжандын түшүндүрмөсүндө.

Окуянын чоо-жайына кайрылсак:

Милициянын маалыматына таянсак, жергиликтүү тургундардын бири кайтарылган ишкананын аймагына кирип кеткен. Ал ишкананын аймагынан чыгарылып, бирок арадан көп убакыт өтпөй ал 10дон ашуун айылдашын ээрчитип келип уруш чыгарышкан. Тургундар кенди кайтарган атайын даярдыктагы отрядынын 3 кызматкерин таш бараңга алып, алар ар түрдүү жаракаттарды алышкан. Бул факт боюнча бейбаштык жана бийлик өкүлүнө карата зомбулук көрсөтүү беренелери менен кылмыш иштери козголгон. 2-декабрда окуяга катыштыгы бар Терек-Сай айылынын 15 тургуну суракка алынып, 6 адам 2 айга убактылуу кармоочу жайга, 9у СИЗОго киргизилди.

3-декабрда Терек-Сай айыл өкмөтүндө 300дөй тургун кен иштеткен фирманын иштөөсүнө каршы митинг өткөргөн. Жергиликтүү тургун Айдайкан Суранованын айтымында, ноябрь айында Терек-Сай айылынын тургуну жылкысына кетип жатканда, аны түрктөрдүн фирмасындагы постту кайтарган адам уруп койгон. "Кийин айылдык балдар барып постту кайтаргандар менен мушташкан экен. Кайтаруучулардын бири жардан кулап, буту сыныптыр. Буга тиешеси бар деп 15 баланы милиция 2-декабрда кармап кетти", - деген Суранова.