2019-жылы Орусиядан күйүүчү майларды салыксыз ташып келүү боюнча келишимге кол коюлду

2019-жылы Кыргыз жерине Орусиядан күйүүчү майларды салыксыз ташып келүү боюнча келишимге кол коюлду. Бул тууралуу SUPER.KG'ге Нефтетрейдерлер ассоциациясынын аткаруучу директору Канат Эшатов кабарлады.

Келишимге 6-декабрда Өнөр жай, энергетика жана жер казынасын пайдалануу мамлекеттик комитети менен Орусиянын Энергетика министрлигинин өкүлдөрү кол коюшту.

Канат Эшатов муну менен кийинки жылы Кыргыз жеринде күйүүчү май боюнча маселе жаралбай турганын белгиледи.

"Кол коюлган келишимге ылайык, кийинки жылы Орусиядан жалпы 1 миллион тонна күйүүчү май салыксыз алып келинет. Бирок көлөмү муктаждыкка жараша өзгөрүшү мүмкүн. Буга Орусия тарап да макул. Себеби 2018-жылы деле 1 миллион тонна көлөмдөгү күйүүчү май ташып келүү керек болсо, кийин муктаждыкка жараша 100 тонна бензин кошуп алганбыз. Азырынча келе жаткан жылда күйүүчү майлардын баасы кандай боло турганын айта албайбыз, анткени баалар ай сайын өзгөрүшү мүмкүн", - деди Эшатов.

Буга чейин Нефтетрейдерлер ассоциациясы 2019-жылдын башына чейин Орусиядан күйүүчү майларды салыксыз ташып келүү боюнча келишим ырасталбаса күйүүчү майлардын баасы 2-3 сомго кымбатташы мүмкүн экенин кабарлаган.