Москвада залкар жазуучу Чыңгыз Айтматовдун эстелиги ачылды

Бүгүн, 7-декабрда Москвада залкар жазуучу Чыңгыз Айтматовдун эстелиги ачылды. Жазуучунун 90 жылдыгын белгилөөнүн алкагында өткөн саамалыкка президент Сооронбай Жээнбеков, Москва шаарынын мэри Сергей Собянин, маданият, маалымат жана туризм министри Азамат Жаманкулов, Орусиянын маданият министри Владимир Мединский, Кыргыздын Орусиядагы элчиси, Жогорку Кеңештин депутаттары катышты.

Чыңгыз Айтматовдун эстелигинин авторлору Азамат Абдрахманов жана Орусия тараптан архитектор Сергей Павлов. Скульптура колодон куюлуп жасалган. Бийиктиги 2 метр 70 сантиметр.

Эстелик Павлов көчөсү менен Подольск шоссесинде жайгашкан Чыңгыз Айтматов атындагы скверге орнотулду.

Улуу жазуучу Чыңгыз Айтматовдун 90 жылдыгына дүйнө коомчулугу да өзгөчө көңүл буруп жатат. Буга байланыштуу иш-чаралар БУУнун Башкы Ассамблеясында, ТҮРКСОЙ эл аралык уюмунда, Орусия, Түркия, Казакстан, Өзбекстан, Азербайжан, Беларусь, Англия, Германия, Япония, Кытай жана башка өлкөлөрдө өткөрүлгөнү белгиленди.