ЭЛДИК ВИДЕО: Унаанын ичинен ачуу чаңырып, инспектордон жардам сураган аялга көңүл бурбай койгон кызматкердин окуясы боюнча иликтөө жүрүүдө

Интернетте 9-декабрь күнү жергиликтүү телеканалдардын биринде тартылган берүү кызуу талкууга алынды. Анда инспектор жолдон унааны токтотуп, унааны ач дегенине айдоочу баш ийген эмес. Ал эми унаанын ичинде белгисиз аял жардам сурап кыйкырып жатканын угууга болот. Аңгыча унаадан башка бир эркек киши түшүп, "алар менин иним менен аялы, экөөнүн ортосунда үй-бүлөлүк чыр чыгып, урушуп жатышат" деп инспекторду унаадан алыстатуу аракетин көргөн. Бир учурда эшик ачылып кетип, ичиндеги аял "коё бергилечи мени, мен эч кандай мунун аялы эмесмин" деп кыйкырып, ыйлаганы тартылган. Бирок Жол кыймылынын коопсуздугун камсыздоо башкармалыгынын инспектору бул окуяга эч кандай чара колдонгон эмес.

Бул окуя боюнча Жол кыймылынын коопсуздугун камсыздоо башкы башкармалыгы учурда инспекторго карата кызматтык иликтөө башталганын билдирди.