Футболчу Ильзат Ахметов: "Мен өлкөмдү саткан жокмун, тескерисинче, туулган жеримдин атагын чыгаргым келет"

Мурдагы футболчу, комментатор, блогер Евгений Савин Кыргыз жеринен чыккан футболчу Ильзат Ахметов менен маек курду. Евгений Савин өзүнүн видеоблогунда Москва шаарында жашаган Ильзат Ахметов менен маек куруп келип, Ахметовдун биринчи машыктыруучусу жана атасынын пикирин уккан.

Маектин жүрүшүндө Савин Ильзат Ахметовго төмөнкүдөй суроо берген:

- "Сага "Орусиянын жарандыгын алып, өлкөбүздү сатып кеттиң" деп жазгандар болдубу? Аны кандай кабыл алдың?"

- "Чынында "өлкөбүздү сатып кеттиң" деп жазышса, ыза болом. Бирок мен аны жүрөккө жакын кабыл албайм. Анткени бул абалды түшүнгөндөр менин чечимимди туура кабыл алышат. Мен өлкөмдү саткан жокмун, тескерисинче, туулган жеримдин атагын чыгаргым келет", - деп жооп кайтарды.

Ильзат Ахметов 1997-жылы Бишкек шаарында туулган. Алгач бишкектик "Алга" футболдук клубунда ойноп келген. 11 жашында Орусияга барып, Юрий Коноплёвдун футбол академиясында тарбияланып баштаган. Андан соң Ильзат Ахметов "Рубин" футболдук клубу менен келишим түзүп, 16 жашында "Рубинде" дебют жасаган. 2018-жылы Ильзат Ахметов ЦСКА клубуна келген. Азыркы тапка чейин РЛПнын алкагында 14 оюнга катышып, Чемпиондор Лигасында дагы беттештерге катышканга жетишкен. Орусия улуттук курама командасынын башкы машыктыруучусу Станислав Черчесов Ильзат Ахметовду курамга чакырган. Бирок Ахметов жаракат алганына байланыштууу машыгуу жыйындарына бара алган эмес.