Токтогулда айылдык маданият үйү толугу менен өрттөнүп, китепканасындагы 11 миңден ашуун китеп күйүп кетти

Токтогул районундагы Торкен айылынын маданият үйү өрттөнүп кетти. Өрттүн кесепетинен 11 миң 700 китеп толугу күйүп кеткен. Бул тууралуу бүгүн, 12-декабрда ӨКМнын басма сөз кызматынан билдиришти.

Маалыматка ылайык, өрт 12-декабрга караган түнү саат 01:44 чамасында Торкен айыл аймагындагы Пахтахун көчөсүндө жайгашкан айылдык маданият үйүндө чыккан.

"Өрт кырсыгы чыккан жерге 3 өрт өчүрүүчү унаа тартылган. Өрттүн кесепетинен болжол менен 455 чарчы метр аянт күйүп кетти. Маданият үйү 1948-жылы курулуп, дубалы кыштан, чатыры жыгач конструкциялардан тургузулган, 1 бөлмөсү китепкана (11 миң 700 даана китеп болгон) катары колдонулган, ичиндеги мүлктөрү толугу менен күйүп кеткен", - деп айтылат маалыматта.

Учурда ӨКМнын кызматкерлери тарабынан өрттүн келип чыгуу себептери жана келтирилген материалдык чыгымдар такталууда.