Бишкектеги абанын булганышын өлчөй турган жаңы жабдуу сатып алынат

Абанын булганышын өлчөөчү жаңы жабдык сатып алынат. Бул тууралуу Айлана-чөйрөнү коргоо жана токой чарба агенттигинин директору Абдыкалык Рустамов SUPER.KG порталына билдирди.

Анын айтымында, жаңы жабдыктар “Мамлекеттик сатып алуулар” мыйзамынын негизинде сатып алынат. Тендерге катышууну каалагандар 3-январга чейин арызын жөнөтсө болот.

"Тапшырмалардын алкагында Орусия, Кытай, Америкабы биз койгон техникалык параметрге жараша абанын тазалыгын караган эки көмөк чордонун (подстанция) сатып алып келип коюп берет. Бүт талаптарга жооп берген заманбап аппараттар болот. Алар Бишкекте абанын сапатын жакшыртуу иштерин жолго коюуга да жардам берет", - деди агенттиктин директору.

Рустамов Бишкек шаарындагы абанын булгануусу негизинен автоунаалардын көптүгүнө байланыштуу болуп жатканын кошумчалады.

"Өзгөчө кырдаалдар министрлигинин алдындагы Гидрометеорология агенттигинин Бишкек боюнча көмөк чордондору бар. Ал жактан тийиштүү маалыматтар келип, Кыргыз Республикасы боюнча анализ жүргүзүлөт. Ал эми Бишкектин абасы нормадан 20 эсе көп булганган деген маалымат туура эмес. Ар бир жыйынтык жүргүзүлгөн талдоолордун негизинде гана чыгарылып, расмий маалымат берилет", - дейт Рустамов.