Өзбекстандын Эмгек сиңирген артисти, куудул Обид Асомов каза болду

Белгилүү өзбек куудулу, Өзбекстандын Эмгек сиңирген артисти Обид Асомов 55 жашында мезгилсиз дүйнөдөн кайтты. Бул тууралуу Өзбекстандын жергиликтүү маалымат булактары Саламаттыкты сактоо министрлигинин берген маалыматына таянып жазышууда. Куудул бүгүн, 14-декабрда Ташкент шаарында ооруканада каза болгон. Асомов 11-декабрда жүрөк оорусу кармап ооруканага жеткирилген.

Обид Асомов 1963-жылы 22-октябрда Ташкент шаарында туулган. Ал алгач сүрөтчү адистиги боюнча билим алып, андан соң Ташкенттеги театрдык институтта окуп, аны аягын чыккан эмес. Анын тамашалуу аскиялары аудиотасмаларга жазылып, миллиондогон тираж менен сатылып, Өзбекстандын учу-кыйырына тараган. Өз мекенинде популярдуулукка жеткен Асомов 2000-жылдардын соңунда "Россия-1" телеканалындагы "Кривое зеркало" телеберүүсүнө катыша баштаган соң КМШ өлкөлөрүнө таанылган.

Ушул жылдын июнь айында Обид Асомов Кыргыз өлкөсүндөгү күйөрмандарына да келип, куудул Борончу Кудайбергенов менен бирге концерт коюп кеткен. Анда Асомов SUPER TV'га үй-бүлөсү, чыгармачылыгы, жубайы жана Кыргыз өлкөсү тууралуу кенен маек куруп берген.

Обид Асомовдун артында жубайы жана 1 уул, 3 кызы калды.