Орусияда каза болгон жарандын сөөгүн Кыргыз жерине жөнөтүү үчүн мекендештери каражат чогултуп беришти

Буга чейин Орусияда 45 жаштагы Кыргыз жараны каза болуп, эки күндөн бери өлүк сактоочу жайда жатканы айтылган эле. Маркумдун Орусияда жакындары жок болгондуктан сөөгүн туулуп-өскөн айылына жеткирүү үчүн жардам керек болуп жаткан.

Кайрымдуу адамдар тарабынан жана Орусиядагы чакан айыл фонддорунан каражат бөлүнгөнүн Кыргыз мусулмандар дин башкармалыгынын Орусиядагы өкүлчүлүгүнүн кайрымдуулук фондунан кабарлашты. Маалыматка караганда, жалпы элден 46 600 рубль топтолгон. Мындан сырткары маркум иштеген жерден 20 миң рубль берилген. Каражат маркумду айылына жеткирүү үчүн досуна 12-декабрда берилген.

Белгилүү болгондой, маркум Саидвали Мирзаев 1973-жылы Лейлек районунун Арка айылында туулган. Ал Ногинск шаарында жүрүп ашказаны ооруп ооруканага кайрылган. Бирок үч күндөн кийин ооруканада жатып каза болуп калган.