Депутат: "Таанышым Бишкекте 600 сом турган дарыны Москвада 300 сомдон сатып алды"

Бүгүн, 17-декабрда Жогорку Кеңеште бюджет жана финансы боюнча комитетинин жыйыны өтүүдө. Анда "Милдеттүү медициналык камсыздандыруу фондунун 2018-жылга бюджети жана 2019-2020-жылдарга божомолу жөнүндө” мыйзам долбоору каралып жаткан учурда депутат Эмил Токтошев дарылардын баасы көзөмөлдөнбөй жатканын айтты.

Эл өкүлү бир эле дарынын баасы Кыргыз мамлекетинде Орусияныкына салыштырмалуу эки эсе жогору экенин билдирди.

"Дарылардын баасын ким аныктайт? Бир таанышым бир эле дарыны Бишкектин дарыканаларында 600 сомго алыптыр. Ал эми Москвада ошол эле дарыны 300 сомго алыптыр. Бизде эки эсе жогору болуп жатат", - деди Токтошев.

Милдеттүү медициналык камсыздандыруу фондунун төрагасы Марат Калиев дарылардын баасы боюнча комиссия түзүлгөн дейт. "Бизде дарыларга болгон бааны көзөмөлдөө боюнча комиссия түзүлгөн. Бирок бизде дарыларды сатууда ачык рынок болгондуктан баалар өйдө-ылдый боло берет", - деп билдирди чиновник.

Депутаттар аталган фонддун төрагасы берилген суроолорго так жооп бере албагандыгын сынга алып, кийинки жыйынга даярданып келүүсүн талап кылышты.

"Кийинки жыйында дагы ушундай так жооп бере албасаңыз, сиздин ишмердүүлүгүңүздү карайбыз. Сиздей кызматкер мамлекетке кереги жок", - деп белгилешти депутаттар.