Кытайдагы туугандарын издеген этникалык кыргыздар Тышкы иштер министрлигинин имаратынын алдына чогулушту

Кытайдагы туугандарын издегендер кытайлык кыргыздар бүгүн, 17-декабрда Тышкы иштер министрлигинин имаратынын алдына чогулушту. Алар колуна Кытайдагы "саясий тарбия берүүчү лагерде" кармалып жаткан кыргыздардын абалын билип, тиешелүү чечимдерди кабыл алуусун талап кылган арыздарын кармап алышкан.

Чогулгандар аталган лагерде айрымдарынын экиден, дагы бирөөлөрүнүн 4-5тен тууганы кармалып жатканын айтышууда. Өзүн Адыл Касым уулу деп тааныштырган жаран SUPER.KG'ге бир туугандары акыркы 2-3 жылдан бери дайынсыз болуп жатканын билдирди.

"Менин 38 жаштагы Мамбет, 42 жаштагы Жасын, Тургун деген бир туугандарым, 28 жаштагы Махмуд деген жээним жана 25 жаштагы Амина деген келиним Кытайда кармалып жатат. Айрымдары Кыргыз жерине келип кайрылман макамын алышкан болчу. Жүгүн көчүрүп келүү үчүн кайра барганда кармап кетип лагерге киргизип салышкан. Бирок ошондон бери биринин дагы өлүү же тирүү экендиги белгисиз", - деди Касым уулу.

Кытайда туугандарын издегендер буга чейин президент Сооронбай Жээнбековго жана Бириккен улуттар уюмуна кайрылышкан. Кытайлык кыргыздарды коргоо комитетинин маалыматына караганда, лагерде жалпы 50 миңдей этникалык кыргыз камалып жатат.