Миграция кызматы: "Коомдук жайда тамеки чеккен мигранттар да "кара тизмеге" кирип калышы мүмкүн"

Орусияда эки жолу мыйзам бузган мигрант "кара тизмеге" кирет. Бул тууралуу Мамлекеттик миграция кызматынын жетекчисинин орун басары Самат Токтоболотов Мигранттардын эл аралык күнүнө карата өткөрүлгөн жыйында билдирди.

Анын айтымында, мигранттар коомдук жайда тамеки чеккени үчүн да "кара тизмеге" кирип калышы мүмкүн.

"Бүгүнкү күндө Мамлекеттик миграция кызматынын Орусияда 9 кызматкери бар. Албетте, ал жакта иштеп жаткан мекендештердин санын эске алганда 9 кызматкер аздык кылат. Буга байланыштуу биз Орусиядагы диаспоралардан жардам алууга муктаж болуп жатабыз.

"Кара тизмеге" кирүү үчүн 2 жолу чоң эмес мыйзам бузуу жетиштүү. Мигранттар майда мыйзам бузуулары үчүн да "кара тизмеге" түшүп калган учурлар кездешет. Мисалы, коомдук жайларда тамеки чексе же жол чырактын кызыл жарыгынан өтүп кетсе, аларга айып пул салынат. Мунун баары жарандарыбыздын "кара тизмеге" кирип калышына себеп болушу мүмкүн", - деди Токтоболотов.