"Кыргыз-Казак чек арасындагы "Ак-Жол" бекети - коррупциялык схеманын очогу" дейт депутат

Депутат Салайдин Айдаров Кыргыз-Казак чек арасындагы "Ак-Жол" бекетин "коррупциялык схеманын очогу" деп сыпаттады. Мындай пикирин ал бүгүн, 18-декабрда Жогорку Кеңештин Экономика жана фискалдык саясат боюнча комитетинин жыйынында билдирди.

Эл өкүлү чек ара кызматкерлери такси кызматындагы айдоочулардын жүрөк үшүн алып койгонун айтты.

"Таксисттер чек ара кызматкерлеринин алдына чөгөлөшөт экен. Муну депутаттар менен Алматы шаарына барып келе жатып көрдүм. Айдоочу айтып жатат: "Кечээ Алматыдан келе жатканымда Жаңы жылга белекке деп туугандарыма 12 термос сатып алгам. 12 термос үчүн бир саат кармап турушту. "Эмне кылышым керек?" десем, "1 термосуңду ташта" дешти". Ал бир термосту 120 сомдон алыптыр. Мына бүгүнкү күндөгү чек ара кызматкерлеринин абалы. МАИ, Финансы полициясы, Салык кызматы дагы ошол жерде топтошуп алып, коррупцияга малынып калышыптыр", - деп нааразы болду Айдаров.