"Сиз эмне кыйкырасыз?" Депутат Момбеков менен биринчи вице-премьер Боронов парламентте кайым айтышты

"Кызматты алдын ала сатып алып жатасыңар. 5 жылда 5 миллиард сом түшөт деп ким кепилдик берет?" Мындай суроо менен депутат Рыскелди Момбеков биринчи вице-премьер-министр Кубатбек Бороновго кайрылды.

Эл өкүлү "бүгүн турмушка чыккан кызды эртең төрө, анан эгиз төрө деп жатпайсыңарбы" деди.

Боронов: "Биз анткен жокпуз".

Момбеков: "Кайдан билесиңер 5 миллиард сом түшөрүн? Түшпөй калса кантесиңер?"

Боронов: "Бизде техникалык-экономикалык негиздеме бар да".

Момбеков: "Кийинки жылдары аз болуп калышы мүмкүн деп жатат. Анан кантесиңер?"

Боронов: "Аз болот. Ал дагы эске алынган. Ошон үчүн 5 жыл деп эсептелип жатат".

Момбеков: "Компания сотко берсечи?"

Боронов: "Ал келишимде каралган. Компания айып пул элден чогулгандан кийин гана бизден ар бир сүрөт үчүн 211 сомдон ала алат".

Момбеков өкмөттүн маалыматында бюджеттен каражат кетет деп жазылып турганын айтты. Бороновдун маалыматына караганда, ал каражат долбоорго шаарды даярдоо үчүн сарпталат.

Момбеков: "Кетпейт деп туруп, мындай кылган "афёра" да".

Боронов: "Биз эмне жол белгилерин койбошубуз керек беле? Изилдөө жүргүзбөшүбүз керекпи?"

Момбеков: "Сиз кыйкырбаңыз мага!"

Боронов: "Өзүңүз кыйкырбаңыз!"

Момбеков: "Мен сизге суроо берип жатам".

Боронов: "Туура айтыңыз да. Сиз кимсиз мага кыйкыргыдай?"

Момбеков: "А сиз кимсиз мага кыйкыргыдай?"

Боронов: "Мен жооп берип жатам сизге".

Жогорку Кеңеште "Коопсуз шаар" долбоору талкууланып жатат.