Кыргыз өлкөсүнүн жарандары Жаңы жыл майрамынан кийин 7 күн эс алат

Кыргыз Республикасынын өкмөтү Эмгек жана социалдык өнүктүрүү министрлигинин 2019-жылкы дем алыш күндөрүн которуу тууралуу сунушун колдоого алды. Мындай маалыматты Кыргыз Республикасынын өкмөтүнүн аппаратынын маалыматтык камсыздоо бөлүмү жарыялады.

"Кыргыз Республикасынын өкмөтүнүн "2019-жылкы дем алыш күндөрүн которуу жөнүндө" токтом долбооруна ылайык, 2019-жылдын 1, 2, 3, 4, 5, 6 жана 7-январын, ошондой эле 9, 10, 11 жана 12-майын дем алыш күндөрү кылуу сунушталат.

Аталган документ кызматкерлер тарабынан дем алыш жана жумушчу күнү катары саналбаган майрам күндөрүн натыйжалуу пайдалануусуна багытталган. Буга байланыштуу Кыргыз Республикасынын Эмгек жана социалдык өнүктүрүү министрлиги Кыргыз Республикасынын өкмөтүнүн 2018-жылдын 28-февралындагы №117 "Дем алыш күндөрүн которуу жөнүндө" жаңы жылдык майрам күндөрүнө тийиштүү токтомун кайрадан карап чыкты.

Долбоор аркылуу 25-февралдагы дем алыш күнүн 2-январдагы жумушчу күнгө, 8-апрелдеги дем алыш күнүн 3-январдагы жумушчу күнгө, 2-сентябрдагы дем алыш күнүн 4-январдагы жумушчу күнгө, 6-майдагы дем алыш күнүн (5-май дем алыш күнгө туш келгендиктен, эс алуу күнү катары саналат) 10-майдагы жумушчу күнгө которуу сунушталган", - деп билдирген маалыматтык камсыздоо бөлүмү.

Жыйынтыгында жарандар 2019-жылдын 1-январынан 7-январына чейин, ошондой эле май айындагы майрамдарга байланыштуу 9-майдан 12-майга чейин эс алышат.

Кыргыз Республикасынын өкмөтүнүн токтом долбоору мындан мурда Кыргыз Республикасынын өкмөтүнүн расмий сайтына коомдук талкуу үчүн жайгаштырылган.