Кыргыз циркин 14 жыл башкарган Курмангазы Исанаев кызматынан бошотулду

Кыргыз мамлекеттик циркинин директору Курмангазы Исанаев ээлеген кызматынан бошотулду. Тийиштүү буйрукка маданият, маалымат жана туризм министри Азамат Жаманкулов кол койгонун 20-декабрда мекеменин маалымат кызматынан кабарлашты.

Исанаев буга чейин SUPER.KG'ге кызматтан кетүү тууралуу арыз жазганын, жазган арызына ылайык, 2019-жылдын 18-январында кызматтан алына турганын билдирген болчу.

Курмангазы Исанаев цирктин директору болуп, 2004-жылдын 6-октябрында ошол кездеги өкмөт башчы Николай Танаевдин буйругу менен дайындалган.

Кыргыз циркиндеги жетекчилик менен кызматкерлердин пикир келишпестиги 26-ноябрь күнү Жогорку Кеңештин комитетинде көтөрүлүп, циркти ижарага берүүдөгү жана билеттерди сатуудагы коррупция жана башка мыйзам бузуулар болгону айтылып, маселенин чоо-жайын жазганбыз.