Клубдар арасындагы Дүйнө чемпиондугунун финалында "Реал Мадрид" менен "Аль-Айн" командалары беттешет

Бириккен Араб Эмирлигинде өтүп жаткан клубдар арасындагы Дүйнө чемпиондугунун жарым финалдык оюндары жыйынтыкталды.

Түштүк Америка континентинин чемпиону "Ривер Плейт" клубу менен үй ээси катары мелдешке катышып жаткан "Аль-Айн" командаларынын оюну негизги убакытта 3:3 эсебинде жыйынтыкталып, пенальтилер сериясында 5:4 эсебинде талаа ээлери жеңишке жетишти.

Ал эми Чемпиондор Лигасынын Европа жана Азия континенттериндеги жеңүүчүлөрү "Реал Мадрид" жана "Касима Антлерс" клубдарынын оюну 3:1 эсебинде испаниялыктардын жеңиши менен аяктады.

Жарым финалдык оюндардын жеңүүчүлөрү "Аль-Айн" жана "Реал Мадрид" клубдары 22-декабрда Абу-Даби шаарында финалдык оюндун алкагында беттешет.

Клубдар арасындагы Дүйнө чемпиондугу жыл сайын ФИФА уюму тарабынан өткөрүлөт. Ага ФИФАнын курамына кирген 6 футболдук конфедерациянын чемпиондору жана мелдеш өтүүчү өлкөнүн мыкты клубу катышат. Акыркы 2 жылда аталган мелдештин жеңүүчүсү испаниялык "Реал Мадрид" командасы болгон.