"Кырк чоро" Кытайдын Бишкектеги элчилигинин алдында акцияга чыкты

"Кырк чоро" бирикмесинин мүчөлөрү бүгүн, 20-декабрда Кытайдын Бишкектеги элчилигинин алдында тынчтык акциясына чыгышты. Бирикменин төрагасы Замирбек Көчөрбаевдин айтымында, акцияда Кытайдагы улуттук азчылыктарга карата зордук-зомбулукту токтотуу, тарбиялоочу лагериндеги этникалык кыргыздардын камакка алыныш себептери, алардын мыйзамсыз иштери боюнча коомчулукка ачык жарыялоо талабы коюлууда.

Андан сырткары Кыргыз жеринде мыйзамсыз жашап жүргөн чет өлкөлүк жарандар 30 күндүн ичинде өлкөдөн чыгып кетүсүү жана 10 жыл ичинде чет өлкөдөн келип Кыргыз жарандыгын алгандардын жарандык мыйзамдуу алгандыгын аныктоо максатында атайын комиссия түзүү талабы коюлуп жатат.

Учурда Кыргыз жеринде жашап жаткан кытайлык кыргыздар акыркы күндөрү өлкө бийлигине Кытайдагы "саясий тарбия берүүчү лагерде" кармалып жаткан туугандарын бошотууга жардам берүү өтүнүчү менен кайрылып келишет. 17-декабрда да жалпы 10дон ашык кытайлык кыргыздар Тышкы иштер министрлигинин алдына чогулуп, министрликке арыз тапшырышкан.