Мигрант ата-энелерге тартип күчөтүлөт. Алар чет элге чыгуудан мурун балдарын жоопкерчиликти алган адамга өткөрүп берүүгө милдеттендирилет

Өлкөдө 119 миң баланын атасы да энеси да мигрант болуп, балдарын туугандарына таштап кеткен. Бул тууралуу бүгүн, 20-декабрда SUPER.KG порталына ЮНИСЕФтин Кыргыз өлкөсүндөгү коммуникациялар бөлүмүнүн адиси Мавлюда Жапарова билдирди.

Белгилүү болгондой, учурда Кыргыз Республикасынын Балдар кодексине өзгөртүү киргизүү каралууда. Ага ылайык, ата-энеси мигрант болуп жүргөн балдарды туугандары убактылуу милдеттүү камкордукка алуу механизми ишке кирет.

"Биздин негизги максат - ата-энеси тарабынан туугандарына калтырылган балдардын коопсуздугун сактоо, ал балдардын кызыкчылыгын коргоо. Эгер балдар тууган-уругуна калтырылса жакшы, ал эми айрымдар тааныштарына таштап кетип калган учурлар дагы катталып жатпайбы...

Акыркы окуяны эске салсам, таанышына калтырып кеткен 2 жаштагы наристе ур-токмоктон улам чарчап калды. Тилекке каршы, эмгек мигранттардын балдары жакындары тарабынан ур-токмокко алынып, мектепке барбай калган учурлар да жок эмес. Эгер мамлекет тарабынан Балдар кодексине ата-энеси мигрант болуп жүргөн балдарды аны алып калгандарга убактылуу милдеттүү камкордукка алуу колдоо тапса ортодо балдар кыйналбайт. Эң негизги максат - ата-энелердин балдарына болгон жоопкерчилигин күчөтүү. Алар сыртка чыгардан мурун балдарын камкордукка алган адамга тиешелүү документтерди толтуруу менен аны убактылуу калтырмай болот. Ал убакыт аралыгы 3 айдан 6 айга чейин болот. Бул эки тарапка тең жоопкерчилик жүктөйт жана балага жоопкерчилик алган адам мыйзам алдында да жооптуу болот", - дейт Жапарова.

ЮНИСЕФтин адиси баса белгилегендей, Кыргыз Республикасынын Балдар кодексине өзгөртүү киргизүү тиешелүү мекемелер тарабынан колдоо тапкан.