Футбол боюнча Кыргыз курамасы Иорданияны жеңди

Футбол боюнча Кыргыз улуттук курамасы Азия Кубогуна даярдануу максатында Иордания курамасы менен жолдоштук беттеш өткөрүп, 1:0 эсебинде жеңишке жетишти.

Оюн кечээ, 20-декабрда Катар өлкөсүндө болуп, жабык тартипте өттү.

Белгилүү болгондой, Кыргыз улуттук курама командасы 7-декабрдан тарта Катардын Доха шаарында окуу-машыгуу жыйындарын өткөрүп жатат. Анын алкагында курама команда дагы 2 жолдоштук беттеш өткөрөт. 25-декабрда Катар курамасы менен, ал эми 31-декабрда Палестина курама командасы менен беттешет.

Азия Кубогу 2019-жылы 5-январь-1-февраль аралыгында Бириккен Араб Эмираттарында өтөт. Анда тайпалык баскычта Кыргыз улуттук курама командасы Түштүк Корея, Кытай жана Филиппин курамалары менен кездешет.