Сот Шадиевге карата сырттан 10 жылга күчөтүлгөн режимде жаза өтөө чечимин чыгарды, мүлктөрү мамлекетке өткөрүлөт

Быйыл апрель айында өлкөдөн АКШга качып кеткен Жогорку Кеңештин экс-депутаты Аскарбек Шадиевдин иши боюнча сот чечим кабыл алды. Шадиевге карата 10 жылга күчөтүлгөн режимде жаза өтөө чечими чыкты. Андан сырткары мүлктөрү мамлекеттин эсебине өткөрүлөт. Чечим сырттан окулду.

Отурум бүгүн, 25-декабрда Бишкек шаарынын Биринчи Май райондук сотунда уланды. Шадиевдин жактоочусу жогорку инстанцияга 10 күндүн ичинде кайрылса болот.

Соттук отурумда мамлекеттик айыптоочу Шадиевдин иши боюнча жүйөлөрдү келтирип, аны 11 жылга эркинен ажыратууну соттон сураган. Отурумда Шадиев Тажикстандын Хожент шаарына Лейлек району аркылуу чек араны мыйзамсыз кесип өтүп АКШга дипломатиялык паспортун колдонуу менен учуп кеткени айтылды.

Окуянын чоо-жайы:

Ушул жылдын 29-апрелинде Аскарбек Шадиевге карата “кызматынан кыянаттык менен пайдалануу” беренеси боюнча Башкы прокуратура кылмыш ишин козгогон. 1-июнда УКМК Шадиевдин 27-апрелде Кыргыз өлкөсүнөн чыгып, АКШга кетип калганын аныктаганын билдирген.

25-июнда ага карата “чек араны мыйзамсыз кесип өтүү” беренеси боюнча кылмыш иши козголгон. 2-июлда Башкы прокуратура дагы бир кылмыш ишин козгоп, ал “мыйзамсыз жол менен алынган акчалай каражаттарды же башка мүлктү легалдаштыруу” беренесинин негизинде ачылган. 20-октябрда Шадиевдин иши боюнча тергөө аяктап, сотко өткөн. 2-ноябрда Аскарбек Шадиев Жогорку Кеңештин депутаты мандатынан ажыратылган.