Тарых музейин оңдоодо 118 миллион сомдон ашык акча мыйзамсыз коротулган

Тарых музейин оңдоодо 118 миллион сомдон ашык акча мыйзамсыз коротулган. Бул тууралуу маалыматты Башкы прокуратуранын басма сөз кызматы тастыктады.

Маалыматка ылайык, учурда аталган иш УКМК тарабынан тергелүүдө.

"Музейди оңдоп-түзөө иштеринде 118 миллион 215 миң сом акча мыйзамсыз колдонулган. Учурда бул факт боюнча Улуттук коопсуздук мамлекеттик комитети иликтөө иштерин жүргүзүп жатат", - деди басма сөз катчы.

Тарых музейи 2016-жылы жабылып, реконструкциялоо башталган. 2018-жылы оңдоп-түзөө иштери соңуна чыгып, 31-август - Эгемендүүлүк күнүнө карата ачылышы керек эле. Бирок жасалуучу жумуштар соңуна чыкпагандыгына байланыштуу музейдин ачылышы белгисиз мөөнөткө жылдырылган.

Музейдин айланасында каржылык мыйзам бузуулар аныкталгандыгына байланыштуу бир нече кылмыш иштери козголгонун Эсептөө палатасынын төрагасы Улукбек Марипов парламент жыйынында билдирген.