Калктын санын кайра тактоого жарым миллиард сом кетет

Бүгүн, 26-декабрда Жогорку Кеңештин жыйынында “Расмий статистика жөнүндө” мыйзам долбоору талкууланды.

Талкууда депутаттар Улуттук статистика комитетинин маалыматтары өкмөт тарабынан толук пайдаланылбай жатканын белгиледи. Аталган жаатта тиешелүү иштерди жүргүзүү керектигине токтолушту. Мындан тышкары расмий статистикалык маалыматтар жарыяланганы менен, анын себебин көрсөткөн далилдер толук чагылдырылбай жатканы эсептөө менен гана чектелбөө керектиги жөнүндө пикирлер айтылды.

Улуттук статистика комитетинин төрагасынын орун басары Азамат Оросбаев комитет тарабынан берилген маалыматтар чындыкка жакын экенин айтты. "Статистикалык мекеменин ишин жакшыртуу боюнча берген сунуштар менен эскертүүлөр дайыма эске алынат", - деди ал.

Улуттук статистика комитети калктын санын кайра тактоону жүргүзүүгө даярданып жатканы белгилүү болду. Ал үчүн бюджеттен 547 миллион сом талап кылынат.

Талкуунун жүрүшүндө депутаттар мыйзам долбоорун колдоо менен бирге, аны андан ары күчтөндүрүү жаатында өздөрүнүн бир катар сунуштарын беришти. Ошондой эле кайсы мамлекеттик орган расмий түрдө туура эмес маалымат берсе, анын жетекчиси жоопкерчиликке тартылууга тийиш экенин кошумчалашты.